Apuntes biográficos/históricosDirector do Instituto Oceanográfico de Vigo de 1941 a 1958, Rodríguez de las Heras naceu en Salamanca o 13 de decembro de 1899. Licenciouse en Ciencias Químicas nesa mesma cidade con Premio Extraordinario. Comezou a traballar no Laboratorio de Madrid do Instituto Español Oceanográfico en 1923 onde acadou a praza de Axudante de laboratorio. Máis tarde é destinado a Vigo como director do Laboratorio.
Pese ao baixo presuposto e o pouco persoal, a actividade investigadora desenvolvíase, moitas veces coa colaboración da Comandancia de Mariña e de particulares o que permitiu diferentes estudos sobre as rías. Coa chegada de Rodríguez de las Heras, aumenta tamén o número de investigadores de laboratorio. Entre eles, atopamos en 1953, á bióloga Ángeles Alvariño González.
Rodríguez de las Heras participou en moitas campañas a bordo do "Xauen", e a súas investigacións centráronse na composición química de moluscos, sobre todo berberecho, e peces.
Estudou tamén sedimentos, tanto en Galicia como no Golfo de Cádiz, e as características químicas da auga de mar nas costas galegas.
Impulsor e fundador da Asociación Nacional de Químicos de España, e foi o segundo presidente dela. Tamén participou na fundación do Colexio Oficial de Químicos de Galicia do que foi o primeiro decano, entre 1952 e 1958.
A dirección do Laboratorio de Vigo ocupouna ata o seu falecemento en agosto de 1958.
Fuentes consultadas1. Instituto Oceanográfico de Vigo. Visitado o día 7 de febreiro de 2023 https://www.ieo.es/