Album literario : Revista semanal de literatura, ciencias...

Apuntamentos: Información extraída de "Historia de la prensa gallega" de Enrique Santos Gayoso:

É unha das publicacións de maior interese das promovidas por Cid Hermida. Aínda que preferentemente literaria e con ausencia case total de textos sobre temas políticos, pode incluírse dentro da área de influencia do rexionalismo. Así, infroma das actividades da Asociación Regionalista Gallega en Ourense (nº 156) á que pertencían varios dos seus colaboradores. Entre os seus colaboradores vanagloriábase esta publicación ourensá de ter os escritores, poetas, ensaístas e xornalistas máis coñecidos de Galiza, cousa que realmente non foi así. A revista foi unha boa publicación local sen demasiadas posibilidades de acadar altos voos. No entanto, nas súas páxinas aparecen traducións de autores estranxeiros e noticias sobre eles. Por exemplo, Zola é moi habitual nestas páxinas, así como referencias ao naturalismo. Son artigos recollidos de publicacións españolas e francesas que nos dan unha idea do interese desta revista -a diferenza da maioría das súas contemporáneas galegas- polo que sucedía en Europa. As discusións sobre o lugar e os estatutos dos Juegos Florales de Galicia tamén ocupa boa parte deste Álbum Literario.O semanario ofrece textos literarios, poemas, biografías, crítica literaria, etc. Contaba cunha sección fixa de pequenos curtos con información da localidade, que se chamaba "En serio y en broma".